Fiirabig-Cup in Fehraltorf 28.04.2017

De Fiirabig-Cup het das Jahr bi gruusigem und chaltem Winterwetter mit Schnee stattgfunde. De TV het am Morge de ganzi roti Platz müsse freischufle und d Wurfstäb sind rot markiert worde, damit mers den im Schnee au wieder gfunde het. Agfange hemmer gad mit Schaukelring, s het den für es 8.59 glängt und de Steno isch zimli z friede gsi mit eusere Leistig. Immerhin simmer im Schaukelring 4. Nach Baume worde. Glichziitig het Speer stattgfunde (6.80) und i de Tanja Kurer hemmer es neus Speer Talent entdeckt.

Nacher isch Ziit für GK gsi, s isch leider nöd alles riibigslos abglaufe und Note isch schlussendli es 8.44 worde. Mer hend ja nochli Ziit zum trainiere bis im Juni ;) Nacher isch den no Hoch und Wurf a de Reihe gsi. Hoch hets für es 8.44 glengt, au dank de Lea ihrne Super 1.40 und Wurf es 7.28. Abr wenns nöd so ultra chalt gsi wer, weremer also sicher wiiter cho und au höcher gumpet.

Nacher ischs den wiiter as Feste gange, dadra chönd sich die einte nüm würkli guet erinnere abr isch eventuell au besser so. Jedefalls trinksch sicher kei Jägi mit Milch.