Herbstturnfahrt vom Damenturnverein

Am Samstig 16. September simer gmüetlich am 10ni im Heiget mit eusne Privatautos abgfahre. Ide Zentralschwiiz hämmer en chline Stopp gmacht will euse Verein es Mitglied het vo witer weg zum sie döt uflade. Komplett simer den witergfahre is Berner Oberland. Womer ade Talstation vom Niderhorn ahcho sind hämer s Bändli gnoh und sind bis uf de Berg uegfahre. Dobe acho hämer leider nöd so lang äh gueti Ussicht gah will de Hochnäbel recht schnell gstiege isch. So simer is Restaurant und händ eus döte verpflägt. Wos den biz uftah hät simer use und händ zerst mal es selfie gmacht und händ eus den uf de Weg in richtig Mittelstation gmacht. Gmüetlich simer über Stock und Stei gwanderet. Vom Wätter her hämer uf eusem Weg alles dörfe erläbe, Näbel, Sunne, Räge und sogar Schnee. Au susch isches recht spannend gsi, rots Grashämmer gseh welles schnell vo eus uf de name „s’füürgras“ trauft worde isch. Mir sind sogar ah Gletschermühlene verbicho. Wommer den im Vorsass ahcho sind hets für die einte ein heisse Kaffi geh und die andere händ en feine Tesser gnosse.

Herbstturnfahrt 3jpg

Nachdem de Rege verbi gsi isch händ mir d Glägeheit gnutz zum mit de Trottis bis ganz abe z fahre. Es isch zimmli chalt gsi und de einte sind d Finger vom Brämse fast abgfrohre, aber Spass hets trotzdem jedi Mängi gmacht. Dune acho hämer eus grad wider ufd Autos verteilt und sind ich eusi Unterkuft, is Gastuus Riedbode gfahre. Es mega schön und herzig igrichtets huus, so richtig heimelig isches gsi. Nachdem mir im oberste Stock euse Masseschlag bezoge händ hämer den zerst emal en Apero gnosse befors der witer zum Znacht esse gange isch. Di einte händ sich vomne feiner Bergfondue und di andere vode grosse Spiesscharte verpflägt. Es isch würkli mega guet gsi und es händ uf jedefall alli gnueg gha. De Spöteri Abig hämer gmüetlich verbracht. Spili gspielt und viel glachet. „Eiger Mönch und Jungfrau“ euse Spruch vom Weekend isch au nachem zähte mal no lustig gsi. Je später dases worde isch desto meh sind den au Gruselgschichte verzellt worde bis sich die einte nüme getraut händ zum ellei is Zimmer laufe. Womer eus den langsam uf de Wäg is Bett gmacht händ hät sich jede no eh Wulledecki gschnapped und sich den demit iikuschelet will es isch würkli sehr chalt gsi, bi eus im Zimmer .

Am nöchste Morge hämmer eus vomne grosszügege Zmorge Buffet gstärcht und sind den uf de Weg id Beatushöle. Bim laufe händ di einte scho vo Muskelkater klagt, aber nöd öpe die Bei sondern vom Lache am gestrige Abig. Mir händ es risigs Wetterglück gha, sodass mer hüt weder Regejacke no Pulli brucht händ. Ide Höhli hämer dänn diä Bäch, Gstein, Pflanze, Seeli und Wasserfäll bestuhnt. Womer den wieder use cho sind hämer eh hammer Ussicht uf de Thunersee gha, ah gwüsse Stelle isches mitem Meer verglichbar gsi, so wunderschön hellblau. Mir sind drufabe an See glofe und vo dete her mitem Schiff zrug zu eusne Autos.

Dete hämer eus den auscho verabschidet und eus uf de Heiweg gmacht. Dankä viel mal fürs Organisiere Katja und Seraina, es isch würkli es super Wuchänänd gsi, wo mir händ dörfe gnüsse.

Larissa Frei