TSST Deutweg Winterthur So, 3.9.17

Am Sunntigmorge am 7.30 Uhr händ sich 10 Turnerinne und 5 Turner vom DTV und TV für d’Fahrt uf Winterthur versammlet. D’Motivation häts sich in Grenze ghalte, will s’Wätter nöd zum Liechtatheltik mache ihglade hät. Nach de erste Diszipline 100m für d’Manne und 80m für d’Fraue isch mer nanig is schwitze cho und mer hät gern wieder en Pulli oder e Jacke ahgleit.

Schlüderball, Kugelstosse, Hochsprung, Wiitwurf und Wiitsprung sind di wiitere Diszipline vo eus Fraue gsii. Zum Glück isch am Mittag d’Sunne cho und d'Temperature sind dän doch na summerlich worde. Im Wiitwurf händ mer de 10. Platz vo 42 erreicht und das hät e Uszeichnig gäh. Bravo!

Es isch en lässige Wettkampf gsii und vilicht lönd sich nächst Jahr chli meh Turnerinne und Turner zum  mitmache motiviere =)